لاہور ہائیکورٹ نے فرح شہزادی کے بچوں کے نام ای سی ایل سے نہ نکالنے پر توہین عدالت کی درخواست پر وفاقی سیکرٹری داخلہ اور ڈی جی پاسپورٹ کو نوٹس جاری کر دیے۔
لاہور ہائی کورٹ کے جسٹس رسال حسن سید نے فراز اقبال اور ایمان اقبال کی توہین عدالت کی درخواست پر سماعت کی۔
دوران سماعت وکیل نے موقف اختیار کیا کہ درخواست گزار بچوں کے والدین پر سیاسی بنیادوں پر کیسز بنائے گئے، عدالتی حکم کے باوجود درخواست پر متعلقہ فریقین نے فیصلہ نہیں کیا، لہٰذا عدالت فریقین کے خلاف توہین عدالت کی کارروائی عمل میں لائے۔
ہائی کورٹ نے استفسار کیا کہ کیا عدالت کے حکم پر فریقین نے درخواست پر تین روز میں فیصلہ کیا؟جس پر وفاقی حکومت کے وکیل نے جواب داخل کرانے اور ہدایات لینے کیلئے مہلت مانگ لی۔
لاہور ہائی کورٹ نے فریقین کو نوٹس جاری کرتے ہوئے آئندہ سماعت پر جواب طلب کر لیا اور درخواست پر سماعت ملتوی کردی۔
