مشہور زمانہ کامیڈی فلم ویلکم کے تیسرے سیکوئل سے اسکے کردار اُدے بھائی کو نکالے جانے پر ناناپاٹیکر نے خاموشی توڑ دی۔

گزشتہ دنوں بالی ووڈ اداکار اکشے کمار کے جنم دن پر بلاک بسٹر کامیڈی سیریز ’ویلکم‘کی نئی فلم کا ٹریلر جاری کردیا گیا۔

ویلکم 3 کا نام ویلکم ٹو دا جنگل ہے، فلم سازوں کی جانب سے بتایا گیا ہے کہ اب فلم میں اُدے بھائی (نانا پاٹیکر) اور مجنو بھائی (انیل کپور) نظر نہیں آئیں گے بلکہ انکی جگہ پر منا بھائی ایم بی بی ایس کی جوڑی سنجے دت اور ارشد وارثی نظر آئیں گے۔

تاہم اپنی نئی فلم ویکسین وار کے ٹریلر لاؤنچ کے موقع پر ویلکم 3 سے نکالے جانے پر بات کرتے ہوئے نانا پاٹیکر نے کہا کہ شاید میں بہت بوڑھا ہوگیا ہوں تبھی انہوں نے مجھے ویلکم 3 کے لیے کاسٹ نہیں کیا۔

انہوں نے فلم ویلکم تھری کے پروڈیوسرز پر تنقید کرتے ہوئے کہا کہ شاید دا ویکسین وار کے فلم سازوں کو ایسا نہیں لگتا کہ میں بوڑھا ہوگیا ہوں، اس لیے انہوں نے مجھے فلم کے لیے کاسٹ کرلیا۔

دوسری جانب ویلکم 1 اور ویلکم 2 کے ہدایتکار انیس بزمی اب کی بار پارٹ 3 کیلئے ہدایت کاری کے فرائض نہیں نبھائیں گے۔

بھارتی میڈیا کے مطابق ایک موقع پر انیس بزمی سے ویلکم 3 کی کاسٹ کے متعلق سوال ہوا تو انہوں نے کہا کہ میں اگر اس فلم کی ہدایت کاری کر رہا ہوتا تو یہ نانا پاٹیکر اور انیل کپور کے بغیر بنانا مشکل کام ہوتا۔

اس سے قبل یہ رپورٹ بھی سامنے آئی تھی کہ انیل کپور نے فلم میں کام کرنے کے لیے 18 کروڑ روپے کی ڈیمانڈ کی تھی تاہم فلم کے پروڈیوسر فیروز ناڈیاوالہ نے انیل کپور کی فیس کا مطالبہ ماننے سے انکار کر دیا جس کی وجہ سے انیل کپور کو فلم چھوڑنی پڑی۔

فلم ’ویلکم ٹو دا جنگل‘ دسمبر 2024 میں ریلیز ہوگی اور اس کی کاسٹ میں اکشے کمار، سنجے دت، ارشد وارثی، دیشا پٹنی، روینا ٹنڈن، لارا دتا اور پاریش راول شامل ہیں۔