کشمور دھرنے کے بعد کندھ کوٹ کے شہریوں نے اپنے پیاروں کی آزادی کے لیے گولا موڑ انڈس ہائی وے پر دھرنا دے دیا، پولیس سے مذاکرات ناکام ہوئے تو مظاہرین کو منتشر کرنے کے لیے پولیس نے لاٹھی چارج کردی، جس کے نتیجے میں دس سے زائد مظاہرین زخمی ہوگئے۔
کندھ کوٹ کے شہری مغویوں کی بازیابی کے لیے وکیل عبدالغنی بجارانی کی کال پر گولا موڑ انڈس ہائی وے پر صبح دس بجے دھرنا دیا گیا، جس میں سینکڑوں شہری اور ورثاء شریک ہوئے۔
دھرنے کے باعث سندھ سے پنجاب کی ٹریفک معطل ہوگئی۔
ایس ایس پی امجد احمد شیخ دھرنے کو ختم کرانے کے لیے مظاہرین سے مذاکرات کیلئے پہنچے۔
مسلسل ایک گھنٹے تک جاری رہے مذاکرات میں ایڈووکیٹ عبدالغنی بجارانی نے ایس ایس پی کو دو ٹوک جواب میں کہا کہ جب تک مغوی بازیاب نہیں ہوں گے تب تک دھرنا ختم نہیں کیا جائے گا۔
ایس ایس پی کے واپس جانے کے بعد پولیس کی بھاری نفری لاٹھیوں کے ساتھ دھرنے والے مقام پہنچ گئی اور لاٹھی چارج شروع کردیا، جس پر مظاہرین اور پولیس آمنے سامنے آگئے، پتھراؤ اور لاٹھیوں سے علاقہ میدان جنگ بنا دیا گیا۔
پولیس کی لاٹھیوں سے دس سے زائد مظاہرین زخمی ہوگئے۔
