روایتی حریف پاکستان اور بھارت کے درمیان چند روز بعد ہونے والا کرکٹ میچ خطرے میں پڑ گیا ہے۔
پاکستان اور بھارت کی ٹیمیں 2 ستمبر کو سری لنکا کے پالی کیلے اسٹیڈیم میں ایشیا کپ 2023ء کیلئے ایک دوسرے سے ٹکرانے والی ہیں۔
شائقین کو اس سنسنی خیز میچ کا بے صبری سے انتظار ہے، لیکن اب یہ میچ کھٹائی میں پڑتا دکھائی دے رہا ہے، کیونکہ اس دن بارش کی پیشگوئی کی گئی ہے۔
بارش کی اس پیشگوئی نے کرکٹ کے متوالوں کو مایوس کردیا ہے۔
پیشگوئی کے مطابق 2 ستمبر کو بارش کے 80 فیصد امکانات ہیں جبکہ ہوا میں نمی کا تناسب 98 فیصد ہوگا۔
واضح رہے کہ ایشیا کپ کا آغاز 30 اگست سے پاکستان میں ہو رہا ہے، ایونٹ میں کل 13 میچز کھیلے جائیں گے، ابتدائی میچ پاکستان اور نیپال کے درمیان ملتان میں کھیلا جائے گا۔
