نگراں وفاقی وزیر اطلاعات مرتضیٰ سولنگی کا کہنا ہے کہ الیکشن کمیشن جس تاریخ کا اعلان کرے گا اس پر انتخابات کرائیں گے، ہم الیکشن کمیشن کے اختیارات نہیں لینا چاہتے۔
میڈیا سے غیر رسمی گفتگو میں مرتضی سولنگی کا کہنا تھا کہ الیکشن کمیشن نے ایک مؤقف اختیار کیا ہے، ہم اس کے پیچھے کھڑے ہیں، آرٹیکل 218 (3) کے تحت آزادانہ، منصفانہ، غیر جانبدارانہ اور شفاف انتخابات کے انعقاد میں الیکشن کمیشن کی بھرپور مدد کریں گے۔
الیکشن کمیشن کا انتخابی شیڈول پر مشاورت سے انکار، ایوانِ صدر نے وزارتقانون سے رائے مانگ لی
الیکشن دیر سے کرانے کی کوئی خواہش نہیں، حلف کی پاسداری کرینگے، نگراںوزیر اطلاعات
انتخابات کی تاریخ دینے کیلئے صدر علوی نے چیف الیکشن کمشنر کو بلالیا
نگراں وزیر اطلاعات کا کہنا تھا کہ آرٹیکل 51 کے تحت الیکشن کمیشن نئی حلقہ بندیاں کرنے کا پابند ہے، شیڈول بھی دے دیا ہے، آئین میں لکھا ہے کہ ملک کو منتخب نمائندے چلائیں گے،الیکشن کمیشن اگر سمجھتا ہے کہ نگراں حکومت آزادانہ، منصفانہ، شفاف انتخابات کرانے میں ہماری مدد کرے تو ہم مدد کریں گے۔
مرتضیٰ سولنگی کا مزید کہنا تھا کہ معاشی بہتری کے لیے پوری کوشش کر رہے ہیں، نگراں وزیر خزانہ شمشاد اختر چند دن میں معاشی بحالی کا پروگرام پیش کریں گی، ہمیں جس حالت میں ملک ملا ہے ہماری ذمہ داری ہے کہ اس سے بہتر حالت میں ملک منتخب نمائندوں کو دے کر جائیں۔
