بھارتی شہر چنائی میں ایک نوجوان نے میڈیکل کے انٹری ٹیسٹ میں دو بار ناکام ہونے پر خودکشی کرلی کیونکہ وہ اس صدمے کو برداشت نہیں کرسکا ساتھ ہی اس کے والد نے بھی دو دن بعد اپنی جان لے لی۔
میڈیا رپورٹ کے مطابق متاثرہ نوجوان جگدیشورن 12 اگست کو شہر کے کروم پیٹ علاقے میں اپنے کمرے میں لٹکا ہوا پایا گیا، اسے فوری طور پر اسپتال لے جایا گیا جہاں اسے مردہ قرار دیا گیا۔
طالب علم مبینہ طور پر افسردہ تھا کیونکہ وہ دو مرتبہ انٹری ٹیسٹ دینے کے بعد بھی ناکام ہوگیا اور درکار نمبر حاصل نہیں کرسکا تھا۔ پولیس کو کوئی خودکشی نوٹ نہیں ملا تھا۔
نوجوان کے والد نے خود کو پھانسی دینے سے پہلے اپنے بیٹے کی موت کے لیے انٹری ٹیسٹ لینے والی انتظامیہ کو ذمہ دار ٹھہرایا تھا۔ اپنی موت سے پہلے والد نے انتظامیہ کے خلاف احتجاج کرنے کا کہا تھا۔
چیف منسٹر ایم کے اسٹالن نے تعزیت کا اظہار کرتے ہوئے طلباء سے اپیل کی کہ وہ ایسا سخت فیصلہ نہ لیں۔
