ملک میں لوگ گیس کی لوڈ شیڈنگ سے پریشان ہیں ایسے میں پشاور کے سمندر خان نے ایسا چولہا تیار کیا ہے جو بیٹری کی مدد سے چلے گا اور گاڑیوں کا استعمال شدہ موبل آئل اس کا ایندھن ہوگا۔

اگر آپ کے علاقے میں گیس لوڈشیڈنگ کا مسئلہ سنگین ہے تو اب پریشان ہونے کی ضرورت نہیں کیونکہ پشاور کے سمندر خان نے اس کا حل نکال لیا ہے۔

سمندر خان نے لوہے سے منفرد چولہا تیار کرلیا ہے۔ کاغذ کو آگ لگا کر چولہے میں ڈال دیں اور پھر 12 وولٹ بیٹری سے کرنٹ پاس کرکے گاڑیوں کے استعمال شدہ موبل آئل کے ذریعے چولہا جلنا شروع ہوجائے گا۔

سمندر خان کا کہنا ہے کہ گیس کی لوڈ شیڈنگ کی وجہ سے خاصی پریشانی کا سامنا رہتا ہے اس لئے بڑی محنت سے یہ چولہا تیار کیا۔

سمندر خان نے مزید کہا کہ چولہے کو استعمال کرنے کے دوران اس پر آنے والی لاگت بھی بہت کم ہے اور اس کے فوائد زیادہ ہیں۔

اہل علاقہ سمندر کی ایجاد سے خوش ہیں، کہتے ہیں کہ گیس لوڈشیڈنگ سے شدید پریشان تھے لیکن سمندر کی ایجاد نے مشکل آسان کردی۔

سمندر خان کا دعویٰ ہے کہ یہ چولہا ایک لیٹر موبل آئل سے مسلسل چار گھنٹوں کیلئے استعمال کیا جاسکتا ہے، چولہے کی قیمت 8 ہزار روپے مقرر کی گئی ہے۔