وزیر خزانہ اسحاق ڈار کو نگراں وزیراعظم بنائے جانے کے امکان پر وفاقی وزیر برائے منصوبہ بندی احسن اقبال کا کہنا ہے کہ اتفاق رائے ہوگیا تو اسحاق ڈار بھی نگراں وزیراعظم ہوسکتے ہیں، تاہم اتفاق رائے کے بعد ہی نگراں وزیراعظم کا نام سامنے آئے گا۔
اسلام آباد میں میڈیا سے گفتگو کرتے ہوئے احسن اقبال نے کہا کہ نگراں وزیراعظم کے لیے اتحادیوں کا متفق ہونا ضروری ہے، اپوزیشن لیڈر کا اتفاق بھی ضروری ہے۔
وفاقی وزیر نے کہا کہ جو نام بھی سامنے آئے گا سب کے اتفاق رائے سے ہی آئے گا۔
نجی ٹی وی کے پروگرام میں گفتگو کرتے ہوئے احسن اقبال کا کہنا تھا کہ فیصلے جو بھی ہوں گے کابینہ اور اتحادیوں کو اعتماد میں لیا جائے گا۔
گزشتہ روز انسٹی ٹیوشن آف انجینئرز پاکستان کی جانب سے لاہور کے مقامی ہوٹل میں تقریب میں شرکت کے بعد میڈیا سے گفتگو کرتے ہوئے احسن اقبال نے کہا کہ آئینی مدت مکمل کر کے حکومت اقتدار سے الگ ہو جائے گی، اس کے بعد الیکشن کمیشن انخابات کروائے گا، حکومت ختم ہونے سے ایک ہفتہ قبل نگران سیٹ پر مشاورت مکمل کر لیں گے۔
