تھانہ پھلڑہ کے پولیس کانسٹیبل نے اپنی جان ہتھیلی پر رکھ کر سیلابی ریلے میں پھنسے دو بچوں کو بحفاظت نکال لیا۔

خیبر پختون کے ضلع مانسہرہ کے تھانہ پھلڑہ کی حدود میں واقع علاقہ کھٹہ میں مون سون بارشوں سے شدید طغیانی آگئی اور دو بچے پھنس گئے، جنہیں پولیس کانسٹیبل نعیم الاسلام نے بحفاظت نکال لیا۔

پولیس حکام کے مطابق 13 اور 14 سالہ دونوں بچے بکریوں کے لیے پتے کاٹنے گئے تھے کہ اچانک کھٹہ کے مقام پر سیلابی ریلہ آگیا اور بچے پھنس گئے، واقعے کی اطلاع ملتے ہی تھانہ پھلڑہ میں تعینات مانسہرہ پولیس کے جوان کانسٹیبل نعیم السلام نے مقامی لوگوں کی مدد سے اپنی جان کی پرواہ کیے ریلے میں چھلانگ لگادی، اور رسی کے ذریعے بچوں کو بحفاظت باہر نکال لیا۔

ڈی آئی جی ہزارہ طاہر ایوب خان نے کانسٹیبل نعیم السلام کی اس بہادری پر مبارکباد پیش کی اور تعریفی سرٹیفکیٹ و نقد انعام دینے کا اعلان کیا اور کہا کہ ایسے بہادر جوان خیبرپختونخواہ پولیس کا فخر ہے۔