ایمرجنگ ایشیاء کپ میں پاکستان نے روایتی حریف بھارت کا عبرتناک شکست سے دوچار کرکے ٹائٹل اپنے نام کرلیا۔

سری لنکا کے دارالحکومت کولمبو میں ہونے امرجنگ ایشیاء کپ میں پاکستان نے روایتی حریف بھارت کو دھول چٹا دی، اور فائنل میں 129 رنز کے بڑے مارجن سے شکست دے کر ٹائٹل اپنے نام کرلیا۔

پاکستان نے پہلے بیٹنگ کرتے ہوئے بھارتی بالرز کی درگت بنائی اور 8 وکٹوں کے نقصان کے بدلے بھارت کو 353 رنز کا پہاڑ جیسا ہدف دے دیا۔ پاکستان کی جانب سے طیب طاہر نے شاندار سینچری اسکور کی۔

پاکستان کی جانب سے نمایاں بلے بازوں میں صا حبزادہ فرحان نے 65 ، صائم ایوب نے 59 اور مبصر نے 35 رنز بنائے، جب کہ بھارت کی جانب سے ریان پراگ اور راج وردھن نے دو، دو وکٹیں حاصل کیں۔

پاکستان کی جانب سے دیئے جانے والے 353 رنز کے ہدف کے تعاقب میں بھارتی سورما 224 رنز بناکر ڈھیر ہوگئے۔ بھارت کی جانب سے ابھیشک شرما نے 61، سائی سدھارسن نے 29، یش دھل نے 39 رنز اسکور کئے، جب کہ پاکستان کی جانب سے سفیان مقیم نے 3، ارشد اقبال، مہران ممتاز اور وسیم جونیئر نے دو دو وکٹیں حاصل کیں، جب کہ ایک وکٹ مبشر خان نے گرائی، اس طرح پاکستان نے ٹائٹل اپنے نام کرلیا۔