گورنمنٹ علامہ اقبال اسپتال میں زیرعلاج خطرناک ملزم اپنے ساتھیوں کی مدد سے فرار ہوگیا۔
سیالکوٹ کے سرکاری اسپتال (گورنمنٹ علامہ اقبال اسپتال) میں زیرعلاج ملزم اللہ رکھا اپنے ساتھیوں کی مدد سے فرار ہونے میں کامیاب ہوگیا۔
ڈکیتی کے الزام میں گرفتار ملزم کی نگرانی پر ایک پولیس اہلکار (عاصم) تعینات تھا، جسے ملزم کے ساتھیوں نے وارڈ میں ہی یرغمال بنایا اور مزاحمت پر تشدد کا نشانہ بھی بنایا۔
ذرائع کے مطابق زیر علاج ملزم اللہ کے 2 مسلح ساتھی تھے، جنہیں دیکھ کر اسپتال کے سیکیورٹی گارڈ بھاگ نکلے، اور ملزمان آرام سے فرار ہونے میں کامیاب ہوگئے۔
واضح رہے کہ ڈکیتی ملزم کو زخمی حالت میں گرفتار کیا گیا تھا، اور وہ اسپتال میں زیرعلاج تھا، جب کہ ملزم پولیس تھانہ حاجی پورہ کی زیرحراست تھا۔
