اسلام آباد ہائیکورٹ نے فواد چوہدری کےناقابلِ ضمانت وارنٹ گرفتاری معطل کر دیے فواد چوہدری کو 20 جولائی کو الیکشن کمیشن کے سامنے پیش ہونے کا حکم دے دیا۔

اسلام آباد ہائیکورٹ کےجسٹس طارق محمود جہانگیری نے فواد چوہدری ناقابل ضمانت وارنٹ گرفتاری کیخلاف درخواست پر سماعت کی۔

وکیل فیصل چوہدری نے عدالت کو بتایا کہ الیکشن کمیشن میں توہین کمیشن کی کارروائی جاری ہے، ناقابل ضمانت وارنٹ گرفتاری ختم کیے جائیں۔

عدالت نے کہا کہ چیف جسٹس نے فیصلہ دیا کہ توہین کمیشن کی کارروائی جاری رہے گی، چیف جسٹس نے کمیشن کو حتمی فیصلہ جاری کرنے سے روکا ہے۔

جسٹس طارق محمود نے کہا کہ آپ کونوٹس جاری ہوئے ہیں، کیا وجہ ہے کہ آپ وہاں ذاتی حیثیت میں پیش نہیں ہو رہے، آپ نے توہائیکورٹ آرڈرکی بھی خلاف ورزی کی ہے۔

جج کے ریمارکس پر فواد چوہدری کے وکیل فیصل چوہدری بولے کہ ہم اُسی دن اسلام آباد ہائیکورٹ کے سامنے پیش ہوئے تھے۔

عدالت نے کہا کہ الیکشن کمیشن کونسا کراچی میں ہے، ہائیکورٹ سے وہاں چلے جاتے، آپ نے کمیشن میں پیش نہ ہو کر ہائیکورٹ آرڈر کی خلاف ورزی کی ہے۔

عدالت نے کہا کہ آپ کے وارنٹ گرفتاری معطل کررہے ہیں کمیشن کےسامنے پیش ہوں، کمیشن کے سامنے پیش نہ ہوئے تو توہین عدالت کی کارروائی ہوگی۔

عدالت نے فواد چوہدری کو20 جولائی کو الیکشن کمیشن کےسامنے پیش ہونے کا حکم دیا۔