انسداد دہشت گردی عدالت نے جناح ہاؤس حملہ کیس میں تحریک انصاف کے رہنماؤں عمر سرفراز چیمہ اور اعجاز چوہدری کے جسمانی ریمانڈ کی استدعا مسترد کردی۔

لاہور کی انسداد دہشت گردی عدالت میں جناح ہاؤس پر حملے کے کیس کی سماعت ہوئی، جج عبہر گل خان نے کیس کی سماعت کی۔

تحریک انصاف کے رہنماؤں عمر سرفراز چیمہ اور اعجاز چوہدری کو پولیس نے جسمانی ریمانڈ مکمل ہونے پر عدالت میں پیشِ کیا، پولیس کی جانب سے دونوں رہنماؤں کے مزید جسمانی ریمانڈ کی درخواست دی گئی۔

عدالت نے پولیس کی جسمانی ریمانڈ کی درخواست مسترد کردی، اور دونوں رہنماؤں کو جوڈیشل ریمانڈ پر جیل بھیج دیا۔ جب کہ عدالت نے اعجاز چوہدری اور عمر سرفراز چیمہ کو 24 جولائی کو دوبارہ عدالت پیش کرنے کا حکم جاری کرتے ہوئے کیس کی سماعت ملتوی کردی۔

واضح رہے کہ عمر سرفراز چیمہ اور اعجازِ چوہدری کے خلاف تھانہ سرور روڈ میں جناح ہاؤس پر حملے کا مقدمہ درج ہے۔