جناح اسپتال کراچی میں ٹک ٹاکرعائشہ کی لاش چھوڑ کر فرار ہونے کے کیس میں ملزم نے عدالت میں بیان دیا کہ زمین پر گری خاتون کی جان بچانے کی کوشش میرا جرم بن گیا۔
کراچی کے جوڈیشل مجسٹریٹ جنوبی کی عدالت میں کیس کی سماعت ہوئی۔ پولیس نے جسمانی ریمانڈ مکمل ہونے پرملزم جبران کو عدالت میں پیش کیا۔
پولیس نے عدالت کو بتایا کہ ملزم کو سی سی ٹی وی فوٹیج کی مدد سے گرفتار کیا، واقعے کا مقدمہ تھانا ڈیفنس میں درج ہے۔
ملزم جبران نے عدالت کو بتایا کہ زمین پر گری ہوئی خاتون کی جان بچانا میرا جرم بن گیا۔ عدالت نے ملزم جبران کی بات سننے کے بعد اسے ریمانڈ پر جیل بھیج دیا۔ عدالت نے آئندہ سماعت پر تفتیشی افسر سے کیس کا چالان طلب کرلیا۔
یاد رہے کہ گزشتہ ماہ کراچی کے علاقے ڈیفنس کے بنگلے میں مبینہ ڈانس پارٹی کے دوران لڑکی کی موت ہوگئی تھی، جسے ایک لڑکا اور لڑکی نے جناح اسپتال پہنچایا اور موت کی تصدیق کے بعد لاش چھوڑ کر فرار ہوگئے، ایمرجنسی اور پارکنگ کی فوٹیج میں لڑکا اور لڑکی کے چہرے واضح طور پر دیکھے جاسکتے ہیں۔
ابتدائی تحقیقات کے مطابق متوفیہ لڑکی کی شناخت عائشہ کے نام سے ہوئی، جو شیخوپورہ سے تعلق رکھتی تھی، اور شادی کے بعد کراچی کے علاقے گلستان جوہر میں مقیم تھی۔
