کراچی کے علاقے لانڈھی میں واقع فیملی پارک میں داخلے سے منع کرنے پر اوباشوں کے مسلح گروہ نے علاقے میں فائرنگ کر کے خوف و ہراس پھیلا دیا۔
فائرنگ کا واقعہ لانڈھی نمبر چار زمان آباد کے فیملی پارک میں پیش آیا، جس کی سی سی ٹی وی فوٹیج بھی سامنے آگئی۔
فوٹیج میں مسلح ملزمان کو توڑ پھوڑ اور فائرنگ کرتے ہوئے واضح دیکھا جاسکتا ہے۔ مسلح افراد نے گلی میں کھڑی موٹر سائیکلوں کو بھی نقصان پہنچایا۔
ملزمان کی جانب سے فائرنگ کے باعث علاقے میں خوف و ہراس پھیل گیا، فائرنگ کے دوران شہری جان بچانے کے لیے بھاگتے رہے، مسلح افراد فائرنگ اور توڑ پھوڑ کر کے باآسانی فرار ہوگئے۔
پولیس کے مطابق کچھ لڑکے پارک میں داخل ہونے کی کوشش کر رہے تھے، لیکن فیملی پارک میں داخلہ نہ ملنے پر جھگڑا شروع ہو گیا۔
واقعے کی سی سی ٹی فوٹیج موجود ہونے کے باوجود لانڈھی پولیس فائرنگ کرنے والے مسلح افراد کو گرفتار کرنے میں ناکام ہے۔
