پاکستان تحریک انصاف (پی ٹی آئی) خیبرپختونخوا کے سابق صوبائی وزیر شکیل احمد خان کو تھری ایم پی او کے تحت گرفتار کرلیا گیا۔

ملاکنڈ لیویز نے تھانہ بائزئی میں سابق صوبائی وزیر محکمہ پبلک ہیلتھ شکیل احمد خان کو تحریک انصاف کے ضلعی جنرل سیکرٹری مقبول خان اور دیگر 2 کارکنان سمیت سابق ایم این اے جنید اکبرخان کے حجرے سے گرفتارکرلیا۔

ضلعی انتظامیہ کے مطابق شکیل احمد خان کی گرفتاری تھری ایم پی او کے تحت عمل میں لائی گئی۔

یاد رہے کہ سابق صوبائی وزیر شکیل احمد خان کو 4 دن قبل اینٹی کرپشن کی عدالت نے ضمانت پر رہا کیا تھا، وہ 9 مئی واقعات کے بعد 3 مقدمات میں 46 دن جیل کاٹ کر ضمانت پر ہیں۔

ضلعی انتظامیہ کا کہنا ہے کہ کسی کو قانون ہاتھ میں لینے اور امن وامان کو خراب کرنے کی اجازت نہیں دیں گے۔ سابق وزیر رہائی کے بعد کارکنان کو ایک مرتبہ پھر اکسا کراجلاسوں سے تقاریر کررہے تھے، جس پر گرفتاری عمل میں لائی گئی۔