سندھ ہائیکورٹ نے کراچی کے علاقے ناظم آباد میں غیرقانونی تعمیرات کے خلاف بڑے آپریشن کی ہدایت کردی۔

سندھ ہائیکورٹ میں کراچی کے علاقے ناظم آباد بلاک نمبر 2 میں غیرقانونی تعمیرات کے خلاف درخواست کی سماعت ہوئی۔

عدالت نے ایس بی سی اے کی کارکردگی پربرہمی کا اظہارکرتے ہوئے کہا کہ غیر قانونی تعمیرات سے متعلق مسلسل کیسز عدالت لائے جارہے ہیں، ایس بی سی اے خود غیر قانونی تعمیرات کی روک تھام میں کیوں ناکام ہے؟۔

عدالت نے ڈائریکٹر جنرل ایس بی سی اے کو ذاتی حیثیت میں آئندہ سماعت پر طلب کرتے ہوئے کہا کہ ڈی جی ایس بی سی اے 26 جون کو پیش ہوں۔

ایس بی سی اے کی رپورٹ میں تصدیق کی گئی کہ ناظم آباد 2 نمبر میں پلاٹ 2 سی پر غیر قانونی تعمیرات ہو رہی ہیں، پلاٹ پر تعمیرات سے قبل اجازات نہیں لی گئی ہے، غیر قانونی تعمیرات کے خلاف کارروائی کی جائے گی۔

سندھ ہائیکورٹ نے غیرقانونی تعمیرات کے خلاف بڑے آپریشن کی ہدایت کردی۔

عدالت نے ڈائریکٹر جنرل ایس بی سی اے کو آئندہ سماعت سے قبل کارروائی مکمل کرنے کا حکم دیا۔

غیرقانونی تعمیرات کے خلاف شہری بابر شمسی نے سندھ ہائیکورٹ میں درخواست دائر کر رکھی ہے۔