الیکشن کمیشن آف پاکستان (ای سی پی) نے عام انتخابات کی تیاریاں شروع کردیں، الیکشن کمیشن نے آئندہ انتخابات کے تمام انتظامات کی بروقت اور شیڈول کے مطابق تکمیل کو یقینی بنانے کا حکم دیتے ہوئے واضح کیا کہ اس میں کسی قسم کی کوتاہی برداشت نہیں کی جائے گی۔
چیف الیکشن کمشنر سکندر سلطان راجہ کی زیر صدارت الیکشن کمیشن کا اجلاس اسلام آباد میں ہوا۔
اعلامیے کے مطابق سیکرٹری الیکشن کمیشن نے الیکشن کی تیاریوں سے متعلق بریفنگ میں بتایا کہ ضروری الیکشن مٹیریل اور بیلٹ پیپر کے لیے پیپر کی خریداری مکمل کر کے بحفاظت اسٹوریج کو یقینی بنایا گیا ہے، ڈرافٹ لِسٹ آف پولنگ اسٹیشن بھی تیار کرلی گئی ہے جو ریٹرننگ آفیسروں کے نوٹیفکیشن کے فوراَ بعد ان کے حوالے کی جائے گی۔
بریفنگ میں بتایا گیا کہ ووٹروں کے اندراج ، اخراج اور درستگی کی آخری تاریخ تیرا جولائی ہے، انتخابی فہرستوں کی طباعت وترسیل کے لیے الیکشن کمیشن نادرا سمیت تمام اداروں سے رابطے میں ہے، ڈسٹرکٹ ریٹرننگ آفیسروں ، ریٹرننگ آفیسروں اور اسٹنٹ ریٹرننگ آفیسروں کا نوٹیفکیشن بروقت کردیا جائے گا، پولنگ اسٹاف کی تعیناتی کے لیے ڈیٹا بینک قائم کردیا گیا ہے۔
الیکشن کمیشن نے آئندہ جنرل الیکشن کے انعقاد سے متعلق اب تک کے انتظامات پر اطمینان کا اظہار کیا اور تمام انتظامات کی بروقت اور شیڈول کے مطابق تکمیل کو یقینی بنانے کا حکم دیا۔
الیکشن کمیشن نے کہا کہ اس میں کسی قسم کی کوتاہی برداشت نہیں کی جائے گی۔
اعلامیے میں بتایا گیا کہ اجلاس کے دوران الیکشن کمیشن کو پنجاب اور ضلع کوئٹہ میں بلدیاتی انتخابات کے انعقاد سے متعلق بھی بریف کیا گیا۔
