جناح ہاؤس پر حملے اور جلاؤ گھیراؤ کے کیس میں رہنما پاکستان تحریک انصاف خدیجہ شاہ اور صنم جاوید کی درخواست ضمانت پر وکلاء نے دلائل مکمل کرلیے۔
لاہور کی انسداد دہشتگردی عدالت کے جج اعجاز احمد بٹر نے خدیجہ شاہ ، عالیہ حمزہ ، صنم جاوید ، طیبہ راجہ اور صبوحی انعام سمیت دیگر کی درخواست ضمانت پر سماعت کی۔
عدالت نےعالیہ حمزہ ، صبوحی انعام سمیت دیگر کی درخواست ضمانت پر دلائل طلب کرتے ہوئے کہا کہ تمام خواتین کی درخواست ضمانت پر ایک ساتھ فیصلہ سنایا جائیگا۔کیس میں خدیجہ شاہ اور صنم جاوید کی درخواست ضمانت پر وکلاء نے دلائل مکمل کر لئے ہیں۔
یاد رہے کہ خدیجہ شاہ اور عالیہ حمزہ ملک سمیت 13 خواتین جوڈیشل ریمانڈ پر جیل میں ہیں۔ جناح ہاؤس پر حملے اور جلاؤ گھیراؤ کے کیس میں خدیجہ شاہ سمیت نو خواتین نے ضمانت کی درخواستیں دائر کر رکھی ہیں جس میں خواتین نے استدعا کی ہے کہ ہمیں مقدمہ میں غلط ملوث کیا، ضمانت پر رہائی دی جائے۔
