پاکستانی گلوکارراحت فتح علی خان نے بھارتی پنجاب سے تعلق رکھنے والے آنجہانی گلوکار اور ریپر سدھو موسے والا کو ان کی پہلی برسی پر خراج عقیدت پیش کیا ہے۔

گلوکاراوراپوزیشن جماعت کانگریس کے رہنما سدھو موسے والا 29 مئی کو قتل کردیے گئے تھے۔ نامعلوم افراد نے بھارتی پنجاب کے ضلع مانسا میں سدھو کی گاڑی پرفائرنگ کرکے انہیں نشانہ بنایا تھا۔

راحت فتح علی خان نے اپنی قوالی کی پرفارمنس مقتول موسیقار کے نام کی۔

موسے والا کے آبائی علاقے جواہرکے میں بھی مقامی لوگوں نے بھی گلوکار کو خراج عقیدت پیش کرنے کیلئے ان کی والدہ چرن کور کے ساتھ دعا کا اہتمام کیا۔

گلوکار کے قتل کا واقعہ پنجاب حکومت کی جانب سے سدھو سمیت 424 افراد کی سیکیورٹی واپس لینے کے ایک دن بعد پیش آیا تھا جو بھگونت مان حکومت کی جانب سے وی آئی پی کلچر کے خلاف کریک ڈاؤن کے طورپر واپس لی گئی تھی۔

موسے والا کے والد بلکور سنگھ نے پنجاب میں عام آدمی پارٹی کی قیادت والی حکومت پر ان کے بیٹے کو انصاف دلانے میں ناکام رہنے کا الزام لگایا ہے۔