ماضی میں ایک ہی جماعت میں رہتے ہوئے سیاسی حریف کے طور پر پہچانے جانے والے تحریک انصاف کے رہنما علیم خان اور جہانگیر ترین کی ملاقات ہوئی ہے۔

9 مئی کے پرتشدد واقعات کے بعد اب تک تحریک انصاف کے درجنوں رہنما اپنی جماعت سے راہیں جدا کرچکے ہیں، اور مبینہ طور پر 100 سے زائد رہنما جہانگیر ترین سے ملاقاتیں کرچکے ہیں۔

ذرائع کا کہنا ہے کہ جہانگیر ترین نے اپنے گروپ ممبران سے ٹیلی فونک مشاورت کی ہے، اور بڑی تعداد میں رہنماؤں کی ملاقاتوں کے بعد جہانگیرترین نے جلد اپنے گروپ کا اجلاس بلانے کا فیصلہ کیا ہے۔

سیاسی منظر نامے پر بڑی پیشرفت اس وقت سامنے آئی جب ماضی میں ایک دوسرے کے حریف سینئر سیاستدان جہانگیر ترین سابق سینئر صوبائی وزیر عبدالعلیم خان کے گھر آئے۔

جہانگیر ترین اورعبدالعلیم خان کے مابین ملکی سیاسی منظر نامے پر بات چیت کی گئی موجودہ صورتحال پر مشاورت ہوئی۔

اس موقع پر اسحق خاکوانی، عون چوہدری اور حال ہی میں پی ٹی آئی کو خیرباد کہنے والے شعیب صدیقی،اور سعید اکبر نوانی بھی موجود تھے۔

ذرائع کا کہنا ہے کہ جہانگیر ترین نے گروپ ممبران سے نئی پارٹی کے نام پر مشاورت شروع کردی ہے، اور وہ آج اہم سیاسی رہنماؤں سے ملاقات بھی کریں گے۔