نیب کی سفارش پر چیئرمین پی ٹی آئی عمران خان کا نام ای سی ایل میں شامل کرلیا گیا جب کہ بشریٰ بی بی کا نام بھی ای سی ایل میں ڈالنے کا فیصلہ ہوگیا ہے۔
وفاقی کابینہ نے نیشنل کرائم ایجنسی (NCA) 190 ملین پاؤنڈ اسیکنڈل کیس میں نامزد سابق وزیراعظم عمران خان کا نام ای سی ایل میں شامل کرنے کی منظوری دے دی ہے۔
چیئرمین پی ٹی آئی کا نام نیب راولپنڈی کی سفارش پر ای سی ایل میں ڈالا گیا ہے، اور وفاقی کابینہ نے سرکولیشن سمری کے ذریعے عمران خان کا نام ای سی ایل میں ڈالنے کی منظوری دی۔
ذرائع کا کہنا ہے کہ عمران خان کی اہلیہ بشری بی بی کا نام بھی ای سی ایل میں شامل کرنے کا فیصلہ کرلیا گیا ہے، جس کے لئے نیب کی جانب سے وزرات داخلہ کو خط لکھا جائے گا۔
25 مئی کو تحریک انصاف کے چیئرمین عمران خان سمیت پی ٹی آئی کے 70 رہنماؤں کے نام ای سی ایل میں ڈالے گئے تھے، رہنماؤں کے نام ای سی ایل میں ڈالنے کا فیصلہ 9 مئی کے پرتشدد واقعات پر پولیس کی سفارش پر کیا گیا تھا۔
