خیبرپختونخوا میں جلاؤگھیراؤ اور توڑ پھوڑ میں ملوث پی ٹی آئی کارکنوں کی گرفتاریاں زور پکڑنے لگیں، پولیس نے اب تک 1200 مظاہرین کو گرفتار کرلیا۔
چیئرمین تحریک انصاف عمران خان کی گرفتاری کے بعد پشاور سمیت خیبرپختونخوا میں پُرتشدد مظاہرین نے کئی سرکاری املاک کو نقصان پہنچایا جس کے خلاف پولیس کی کارروائیاں تاحال جاری ہیں۔
اب تک کی تفصیلات کے مطابق پولیس نے صوبے بھر میں 1200 مظاہرین کو گرفتار کرلیا ہے، جس میں 300 افراد کو 7 اے ٹی اے کے تحت گرفتار کیا گیا جبکہ 450 گرفتاریاں ایم پی او کے تحت کی گئیں۔
صوبے بھر میں مظاہرین کے خلاف 112 مقدمات درج کیے گئے جس میں 7 اے ٹی اے کے تحت 18 مقدمات درج کیے گئے۔
ذرائع کے مطابق مظاہروں میں 200 سے زائد سرکاری ملازمین بھی شامل تھے، جن کی نشاندہی کی جارہی ہے۔
اسی طرح ممکنہ طور پر آرمی ایکٹ کے تحت خیبرپختونخوا میں بھی چند مقدمے چلائے جائیں گے۔
