صوبائی الیکشن کمیشن نے بلدیاتی انتخابات میں کامیاب امیدواروں کے حلف کی تاریخ کا اعلان کردیا۔

الیکشن کمیشن سندھ کے مطابق 22 مئی کو بلدیاتی انتخابات میں کامیاب ہونے والے یوسیز کے چیئرمین، وائس چیئرمین اور وارڈ ممبرز حلف اٹھائیں گے۔

صوبائی الیکشن کمیشن نے کہا کہ شہر قائد کے ایوان کے کل منتخب ارکان کی تعداد 246 ہے، لہٰذا کراچی کو کاسمو پولیٹن کارپوریشن کا درجہ دیا گیا ہے۔

واضح رہے کہ بلدیاتی الیکشن کی 9 نشستوں پر مختلف عدالتوں اور الیکشن کمیشن نے نتائج روک رکھے ہیں۔

دوسری جانب الیکشن کمیشن نے سندھ میں بلدیاتی نظام کے اگلے مراحل کا شیڈول جاری کردیا ہے۔

الیکشن کمیشن سندھ کے مطابق ٹاؤن چیئرمین، وائس چیئرمین کے لئے کاغذات نامزدگی 22 سے 24 مئی تک جمع ہوں گے جب کہ 3 سے 4 جون تک ٹاؤن کونسل، سٹی کونسل کے ایوان کی تشکیل مکمل کی جائے گی۔