کراچی میں پی ٹی آئی کے مختلف مقامات پر احتجاجی مظاہرے جاری ہیں، انہی مظاہروں میں شرکت کے دوران پولیس نے پی ٹی آئی رہنما فردوس شمیم نقوی کو گرفتار کرلیا۔
پی ٹی آئی کی جانب سے گلستان جوہر، پہلوان گوٹھ، بلدیہ و دیگر علاقوں میں احتجاج کیا گیا۔
پولیس نے اس دوران فردوس شمیم کو پہلوان گوٹھ سے گرفتار کرلیا۔
پولیس کا کہنا ہے کہ فردوس شمیم کے خلاف حالیہ احتجاج کے بعد کئی مقدمات درج ہوئے۔
نرسری پر انصاف ہاؤس کے پاس احتجاج کرنے والی خواتین کو بھی حراست میں لے لیا گیا۔
پی ٹی آئی میڈیا سیل کے مطابق سینیٹر سیف اللہ خان نیازی کو بھی گرفتار کر لیا گیا ہے۔
سینیٹر سیف اللہ خان نیازی کو اسلام آباد پولیس کی جانب سے گرفتار کئے جانے کے بعد نامعلوم مقام پر منتقل کر دیا گیا ہے۔
پاکستان تحریک انصاف کے سینئر رہنما میاں محمود الرشید کو لاہور کے علاقے ڈیفینس سے گرفتار کیا گیا۔
میاں محمود الرشید کو ڈیفنس سے سی آئی اے اقبال ٹاؤن نے گرفتار کیا۔
آج صبح ہی پی ٹی آئی کے رہنما حماد اظہر کے سیکرٹری فیصل مہر کو بھی گرفتار کر لیا گیا۔
فیصل مہر کو سبزہ زار سے صبح 4 بجے گرفتار کیا گیا۔
یاد رہے کہ پی ٹی آئی کے رہنماؤں کی گرفتاری کا سلسلہ جاری ہے اور اب تک متعدد کو گرفتارکیا جاچکا ہے۔
