پشاور کے علاقے ترناب میں نامعلوم موٹر سائیکل سواروں نے فائرنگ کرکے پولیس کے خفیہ ادارے کا اہلکار قتل کردیا۔

پولیس کے مطابق خفیہ ادارے کا اہلکار ڈیوٹی سے واپس گھر جا رہا تھا کہ ترناب کے مقام پر موٹرسائیکل سواروں نے فائرنگ کردی۔

تھانہ چمکنی کی حدود ترناب نزد نہر چرندہ میں دو موٹرسائیکل پر سوار 4 افراد نے فائرنگ کرکے کانسٹیبل ابرار ولد زرسید ساکن مہر گل کلے ترناب کو شہید کردیا۔

کانسٹیبل ابرار خیبرپختونخوا پولیس کے انٹیلی جنس بیورو (آئی بی) آفس میں سکیورٹی ڈیوٹی پر تعینات تھا اور ڈیوٹی ختم کرکے اپنی موٹر سائیکل پر گھر جا رہا تھا۔

فائرنگ واقعہ کے بعد مقامی پولیس افسران بھاری نفری کے ہمراہ فوری موقع پر پہنچے، وقوعہ سے اہم شواہد اکٹھا کرکے جامع تفتیش کا آغاز کردیا گیا ہے۔

پولیس نے نعش کو تحویل میں لے کر پوسٹ مارٹم کے لیے ہسپتال منتقل کردیا ہے۔

جبکہ علاقے میں بڑے پیمانے پر سرچ آپریشن شروع کردیا گیا ہے۔