دہلی ہائی کورٹ نے دھوکہ دہی پر مبنی ویب سائٹس اور انٹرنیٹ سروس فراہم کرنے والوں کو بغیر لائسنس کے فلم جوان سے متعلق کسی بھی تصویر یا کلپس کو کاپی کرنے، اسٹریم کرنے یا ڈسپلے کرنے سے روک دیا ہے۔

بھارتی میڈیا کے مطابق فلم جوان کے سیٹ سے لیک ہونے والی ویڈیوز مختلف سوشل میڈیا پلیٹ فارمز پر وائرل ہونے کے بعد دہلی کورٹ نے ان تمام وائرل ویڈیوز کو فوری طور پر ڈیلیٹ کرنےکی ہدایت دی ہے۔

اس کے علاوہ، دہلی کی عدالت نے انٹرنیٹ سروس فراہم کرنے والوں کو بھی ہدایت دی ہے کہ وہ ایسی ویب سائٹس تک رسائی کو روک دیں جو فلم کے کاپی رائٹ والے مواد کو اپ لوڈ کررہی ہیں۔

واضح رہے کہ ابھی تک شاہ رخ خان کی فلم کی 2 ویڈیوز لیک ہو چکی ہیں، جن میں سے ایک ویڈیو میں انہیں ایکشن سین شوٹ کرتے دیکھا جا سکتا ہے جبکہ دوسری ویڈیو میں انہیں ایک یاٹ پر ساتھی اداکارہ نین تھارا کے ساتھ ایک رومانوی گانا فلماتے نظر آ رہے ہیں۔

بالی ووڈ اداکار شاہ رخ خان کی یہ فلم 2جون کو ریلیز ہونے والی ہے۔