پولیس کی جانب سے علی زیدی کوعدالت میں پیش نہ کرنے پر تحریک انصاف کے وکلا نے درخواست جمع کروا دی۔
کراچی میں تحریک انصاف سندھ کے صدرعلی زیدی کی گرفتاری کے بعد پولیس کی جانب سے علی زیدی کوعدالت میں پیش نہ کرنے پرتحریک انصاف کے وکلا نے درخواست جمع کروا دی ہے۔
ظہور محسود ایڈووکیٹ کی جانب سے ملیر کورٹ میں جمع کرائی گئی درخواست میں مؤقف پیش کیا گیا ہے کہ علی زیدی کو گزشتہ روز ابراہیم حیدری پولیس نے ان کے دفترسے گرفتار کیا۔
درخواست میں مؤقف اختیار کیا گیا ہے کہ قانون کے مطابق پولیس کوعلی زیدی کو آج عدالت میں پیش کرنا تھا، لیکن پولیس نے تاحال انہیں عدالت میں پیش نہیں کیا جوکہ غیر قانونی ہے۔
ظہور محسود ایڈووکیٹ نے درخواست میں استدعا کرتے ہوئے کہا ہے کہ پولیس نے علی زیدی سے ان کے وکلا کو بھی ملنے نہیں دیا، عدالت ابراہیم حیدری پولیس سے رپورٹ طلب کرے، اور پولیس کے اس غیرقانونی عمل پر افسران کے خلاف کارروائی کی جائے۔
