وزیر توانائی سندھ امتیاز شیخ نے صوبے میں جاری گیس کی لوڈشیڈنگ پر ردعمل کا اظہارکرتے ہوئے کہا کہ سب سے زیادہ گیس پیدا کرنے والا صوبہ گیس سے محروم ہے، سندھ حکومت عوام کے ساتھ کھڑی ہے۔
انہوں نے کہا کہ رمضان المبارک میں گیس کی بندش نے عوام کی زندگی اجیرن کردی ہے اور گیس کی بندش کے باوجود سوئی سدرن کی جانب سے بلوں میں اضافہ ظلم ہے، سوئی سدرن گیس کی تقسیم کے عمل میں مکمل ناکام ہوچکی ہے۔
صوبائی وزیر توانائی نے کہا کہ سب سے زیادہ گیس پیدا کرنے والا صوبہ گیس سے محروم ہے سندھ کی گیس اس کی اپنی ضرورت سے کئی گناہ زیادہ ہے، سوئی سدرن اور اوگرہ کی ہٹ دھرمیوں کی وجہ سے صوبے کی عوام کے ساتھ ناانصافی ہو رہی ہے۔
امتیاز شیخ نے مطالبہ کیا کہ سوئی سدرن اور اوگرہ میں سندھ کی نمائندگی کو یقینی بنایا جائے اس کے ساتھ ہی انہوں نے شکوہ کرتے ہوئے کہا کہ اتحادی حکومت ہونے کے باوجود آئین کے آرٹیکل 158 کی پاسداری نہیں کی جارہی۔
مزید کہا کہ سندھ کی قدرتی گیس سوئی نادرن کو دینا صوبے کے عوام کے ساتھ زیادتی ہے، جب تک صوبے کی عوام کی ضرورت پوری نہیں ہوتی سوئی نادرن کو گیس کی سپلائی بند کی جائے۔
انہوں نے کہا کہ قدرتی گیس ہونے کے باوجود سندھ کےعوام سے ایل این جی کی مد میں اظافی رقم کا تقاضہ مسترد کرتے ہیں، گیس کی بندش اور اضافی بلوں پر ہم عوامی احتجاج کا سامنا کر رہے ہیں۔
امتیاز شیخ نے کہا کہ عوام کا احتجاج ان کا حق ہے سندھ حکومت عوام کے ساتھ کھڑی ہے اضافی بلوں کی واپسی کے لیے وفاقی حکومت سے بات کی جائے گی۔
