چئیرمین تحریک انصاف عمران خان کی نااہلی کیلئے پشاور ہائیکورٹ میں ایک ہی روز دو درخواستیں دائر کردی گئیں۔

عوامی نیشنل پارٹی کے صوبائی صدر نے دائر درخواست میں مؤقف اختیار کیا ہے کہ عمران خان نے قومی اسمبلی کے ضمنی انتخابات کے نامزدگی کاغذات میں اثاثے چھپائے۔

اس سے قبل آج جمعیت علماء اسلام نے بھی پشاور ہائیکورٹ میں عمران خان کی نااہلی کیلئے رٹ پٹیشن دائر کی تھی۔

ایمل ولی خان نے درخواست میں مؤقف اپنایا کہ عمران خان نے توشہ خانہ تحائف غیرقانونی طور پر فروخت کئے، اور اس سے حاصل رقم اثاثوں میں ظاہر نہیں کی۔

درخواست کے متن میں کہا گیا کہ کاغذات نامزدگی میں اہلیہ کی 70 لاکھ مالیت کی جیولری ظاہر نہیں کی گئی، عمران خان نے سات قومی حلقوں کے کاغذات نامزدگی میں اثاثے چھپائے۔

درخواست گزار نے استدعا کی کہ اثاثے چھپانا الیکشن ایکٹ 2017 کی خلاف ورزی ہے، اس لئے عمران خان کو پارٹی کی قیادت سے ہٹایا جائے اور عمران خان ایم این اے شپ کو بھی کالعدم قرار دیا جائے۔