بھارتی پنجاب میں خالصتان تحریک کے حامی امرت پال اورحامیوں کیخلاف مہم کے دوران صحافیوں کے ٹوئٹر اکاؤنٹس بلاک کرنے کے سلسلے میں برطانوی نشریاتی ادارے کے آفیشل پنجابی ٹوئٹر اکاؤنٹ کو بلاک کردیا گیا۔
گزشتہ روز یہ اکاؤنٹ بلاک کیے جانے کے بعد بی بی سی نیوزپنجابی ٹوئٹرہینڈل پرپیغام لکھا نظرآرہا تھا کہ قانونی مانگ پراکاؤنٹ پر پابندی عائد کردی گئی ہے۔
یہ آفیشل ٹوئٹر بلاک کیے جانے کے چند ہی گھنٹے بعد ان بلاک کردیا گیا۔
بعد ازاں بی بی سی پنجابی سے وابستہ گگندیپ سنگھ نے اپنے ٹوئٹرہینڈل پر اُن کی ویب سائٹ پر شائع خبر شیئر کرتے ہوئے بتایا کہ اکاؤنٹ چند گھنٹے بلاک رہنے کے بعد ان بلاک کر دیا گیا اوراب بھارت میں دیکھا جاسکتا ہے۔
گگندیپ سنگھ کے مطابق بی بی سی نے اکاؤنٹ بلاک کرنے سے متعلق بھارتی حکومت کو ایک ای میل بھیجی ہے جس کا جواب آنے کے بعد اس خبر کو اپ ڈیٹ کیا جائے گا۔
واضح رہے کہ بھارت میں خالصتان تحریک کے رہنما امرت پال کیخلاف مہم کے بعد کئی صحافیوں، ادیبوں،سماجی و سیاسی کارکنوں کےٹوئٹراکاؤنٹس کو بلاک کیا گیا ہے۔
