لاہور ہائیکورٹ نے مسلم لیگ (ن) کے قائد نواز شریف کے بیانات میڈیا پر نشر کرنے سے روکنے کی درخواست پر پیمرا سے جواب طلب کرلیا۔
لاہور ہائیکورٹ کے جسٹس شاہد کریم نے نواز شریف کے بیانات میڈیا پر نشر کرنے سے روکنے کے لئے اظہر صدیق ایڈووکیٹ کی درخواست پر سماعت کی۔
عدالت نے درخواست پر پیمرا سے جواب طلب کرتے ہوئے ڈپٹی اٹارنی جنرل اسد باجوہ کو ہدایات لے کر پیش ہونے کی ہدایت کردی۔
درخواست گزار کے وکیل نے کہا کہ نواز شریف سزا یافتہ اور عدالتی اشتہاری ہیں، پیمرا 2020 میں نواز شریف کی تقاریر نشر کرنے پر پابندی عاٸد کر چکا ہے، پابندی کے باوجود میڈیا پر نواز شریف کے بیانات نشر ہو رہے ہیں، پیمرا اس معاملے پر کوٸی ایکشن نہیں لے رہا۔
درخواست میں استدعا کی گئی کہ عدالت نواز شریف کی تقاریر پر پابندی کے فیصلے پر عملدرآمد کا حکم دے، عدالت نواز شریف کی تقاریر نشر ہونے سے روکنے کا حکم دے۔
