وزیراعظم شہباز شریف کا کہنا ہے کہ عمران خان کی جانب سے اپنے ہی آئی ایم ایف پروگرام کی بحالی ناکام بنانے کی کوشش کی جارہی ہے۔
وزیراعظم نے موجودہ صورت، حال پر جاری کردہ اپنے ایک بیان میں اپنے خیالات کا اظہار کیا ہے۔
انہوں نے کہا کہ عمران خان چاہتا ہے ملک میں عدم استحکام کی آگ بھڑکے، سڑکوں پر افراتفری اور فتنہ وفساد اسی ایجنڈے کا حصہ ہے۔
انہوں نے مزید کہا کہ عمران خان یہ نہیں چاہتا کہ غریب عوام کو مہنگائی، معاشی دباﺅ سے نجات ملے اور پاکستان کے لئے وسائل کی راہ ہموار ہو۔
شہباز شریف کا کہنا تھا کہ بزدل شخص عدالت کو تلاشی نہیں دیتا کیونکہ مجرم ہے اور اس کا عدالتوں سے بھاگنا بزدلی کی انتہا ہے۔
ان کا کہنا تھا کہ یہ پہلے آئی ایم پروگرام سے بھاگ گئے، اب عدالتوں سے بھاگ رہے ہیں پھر اپنے وعدوں اور نظریات سے بھاگ گئے، اب عدالتوں سے بھاگ رہے ہیں جبکہ نواز شریف اور مسلم لیگ ن کی قیادت نے نیب نیازی گٹھ جوڑ کے بد ترین انتقام کا سامنہ کیا ہے۔
انہوں نے بتایا کہ ہم اپنے بیٹوں، بیٹیوں اور بہنوں سمیت جھوٹے مقدمات میں عدالتوں اور قانون کے آگے پیش ہوئے ہیں، مسلم لیگ (ن) کے رہنما سزائے موت کی چکیوں میں رہے اور ہیروئن جیسے جھوٹے مقدمات کا سامنا کیا۔
اس سے قبل اپنے ایک بیان میں وزیراعظم کا کہنا تھا کہ جو عدالت کے بلانے پر بھی نہیں آتا، عدالت کے ساتھ وہ کر رہا ہے جو اس نے آئی ایم ایف پروگرام کے ساتھ کیا، عدالت کے ساتھ وہ کر رہا ہے جو قومی مفادات، پاکستان کے دوست ممالک کے ساتھ کیا، عدالت کے ساتھ وہ کر رہا ہے جو اس نے آئین، پارلیمنٹ، اداروں،میڈیا کے ساتھ کیا اور عدالت کے ساتھ وہی کر رہا ہے جو مہنگائی کی صورت میں عوام کے ساتھ کیا۔
وزیراعظم شہباز شریف نے مزید کہا کہ معیشت تباہ کرنے والا آج سیاسی عدم استحکام کے ذریعے اس کی بحالی روکنے کی سازشیں کررہا ہے۔
