عوامی مسلم لیگ کے سربراہ شیخ رشید کا کہنا ہے کہ صدر مملکت عارف علوی الیکشن کی تاریخ دینے کااختیار رکھتے ہیں، انہیں کہتا ہوں پیر کو الیکشن کی تاریخ دیں یا استعفیٰ دیں۔
لاہور میں میڈیا سے بات کرتے ہوئے عوامی مسلم لیگ کے سربراہ شیخ رشید کا کہنا تھا کہ عمران خان سے ملاقات کرنے آیا ہوں، اگر چیئرمین پی ٹی آئی کہیں تو تو پہلی گرفتاری شیخ رشید دے گا۔
شیخ رشید کا کہنا تھا کہ خواجہ آصف کی رگوں میں خواجہ صفدر کا خون دوڑ رہا ہے، گزشتہ روز وزیر دفاع نے حساس وقت پر ایک بیان دیا ہے اور اعتراف کیا ہے کہ ملک ڈیفالٹ ہوچکا ہے، ایک گھٹاٹوپ اندھیری اور طوفان بھی آسکتا ہے، قیمتیں بڑھانے پر بھی آئی ایم ایف ان سے مطمئن نہیں، دوسری جانب سے کہا جاتا ہے کہ اسٹیٹ کو ڈیفالٹ کہنے والا غدار ہے۔
سربراہ عوامی مسلم لیگ نے کہا کہ صوبے اور مرکز کے الیکشن ایک ساتھ ہوں گے، صدر مملکت عارف علوی الیکشن کی تاریخ دینے کا اخیتار رکھتے ہیں، صدر پاکستان پیر کے روز الیکشن کی تاریخ دیں ورنہ استعفی دیں۔
شیخ رشید کا کہنا تھا کہ اگر میں مارا گیا تو زرداری، رانا ثنا، بلاول اور نواز ذمہ دار ہوں گے، بینظیر شہید کے پاس جو فون تھا وہ ابھی تک نہیں ملا، اس فون پر کال آئی تھی کہ باہر نکلو، تحقیق کریں کہ بینظیرکا فون کس کے پاس ہے، بینظیر کو پہلے پشاور میں مارا جانا تھا۔
سابق وفاقی وزیر نے کہا کہ 30 اپریل تک فیصلہ ہوجائے گا، 60 دن میں عمران خان پر حملہ ہو سکتا ہے، 30 اپریل سے پہلے کوئی حادثہ ہوا تو میں ذمہ دار نہیں، ایک نیا شیخ رشید پیدا ہوگیا ہے، لسبیلہ لے جاؤ یا کراچی تمہاری سیاست کو نست و نابود کردوں گا، ۔
شیخ رشید کا مزید کہنا تھا کہ مریم نواز کہتی ہیں کہ یہ میری حکومت نہیں ہے، تو وہ ہمت کریں اور بتائیں کس کی حکومت ہے۔ واحد ملک افغانستان ہے جہاں بلاول کی ضرورت ہے۔ نوازشریف لندن سے نہیں آئے گا، آصف زرداری اصل بیماری ہے، اسی نے ن لیگ کو گڑھے میں پھینکنے کی سازش کی۔
انہوں نے کہا کہ عمران خان کو نااہل کرنے کی غلطی نہیں کرنی چاہئے، عمران خان نے کسی کو کبھی بسکٹ کا ڈبہ نہیں دیا، مجھے سگار کا ڈبہ دیا۔
