کراچی میں موبائل گیم ایک اور کم عمربچی کے مبینہ اغواء کا سبب بن گیا۔
شاہ فیصل کالونی کی 13 سالہ بچی کے والدین نے مبینہ اغواء کا مقدمہ درج کروادیا۔ والدین کے مطابق بچی کا آن لائن گیم لوڈواسٹارگیم پرعبداللہ نامی لڑکے سے رابطہ ہواتھا۔
بچی کےاغوا کامقدمہ شاہ فیصل کالونی تھانے میں والد کی مدعیت میں درج کیا گیا۔
ایف آئی آر کے متن کے مطابق بچی کا لوڈواسٹارگیم پرعبداللہ سے رابطہ ہوا جس نے اپنے رشتے داروں کی مدد سے اسے اغواء کرلیا۔
دوسری جانب بچی کے رات گئے فرار ہونے کی سی سی ٹی وی فوٹیج آج نیوز کو موصول ہوگئی ہے جس میں دیکھا جاسکتا ہے کہ بچی رات تقریباً 3 بج کر 20 منٹ پر گھر سے نکلی۔
بچی نے گھر سے نکلتے ہوئے سی سی ٹی وی کیمرے میں ہاتھ بھی ہلایا، بچی گھر سے جاتے وقت عبایا پہنے ہوئے تھی اور ایک بیگ بھی پشت پر ٹانگ رکھا تھا۔
پولیس نے مختلف پہلوؤں سے واقعے کی تفتیش شروع کردی ہے۔
