پاکستان تحریک انصاف کے گرفتار رہنما فواد چوہدری کی اہلیہ حبا چوہدری کا کہنا ہے کہ جج صاحب کے حکم کے باوجود فیملی کو نہیں ملنے دیا گیا۔

اسلام آباد ہائیکورٹ کے باہر میڈیا سے گفتگو میں حبا چوہدری نے کہا کہ بچیاں 5 دن سے باپ کا انتظار کررہی ہیں، بچیوں کو نہ اڈیالہ اور نہ کہیں اور ملنے دیا جارہا ہے۔

انہوں نے کہا کہ محسن نقوی میرے بچوں کو والد سے ملنے دیں، میرے بچے اپنے والد سے ملنے کیلئے رو رہے ہیں۔

اہلیہ نے بتایا کہ فواد اپنی بچیوں کا پوچھ کر کمرہ عدالت میں رو پڑے۔

ان کا کہنا تھا کہ میری دونوں بیٹیوں کو والد سے ملنے کی اجازت دی جائے، ہائیکورٹ میری اپیل سنے۔