بھارتی ریاست گجرات کے شہر وڈودرا کے علاقے مکار پورہ کی ایک رہائشی کالونی میں منگل کی شام انتہا پسند ہندوؤں نے سانتا کلاز کے لباس میں ملبوس ایک شخص کو بدترین تشدد کا نشانہ بنا ڈالا۔

پولیس نے واقعے کی تصدیق تو کی، لیکن یہ بھی کہا کہ اس سلسلے میں کوئی باقاعدہ شکایت درج نہیں کی گئی ہے۔

پولیس کے مطابق سانتا کلاز کے لباس میں ملبوس ایک شخص کالونی میں چاکلیٹ تقسیم کر رہا تھا۔ وہ اپنی مسیحی برادری کے کچھ لوگوں سے ملنے کالونی گیا تھا جو وہاں مقیم ہیں۔ “کچھ رہائشیوں نے اس کے چاکلیٹ تقسیم کرنے پر اعتراض کیا۔ اسی وجہ سے دو مختلف برادریوں کے درمیان جھگڑا ہوا۔’’

اس واقعے کے بعد، مسیحی برادری کے ارکان نے منگل کی رات پولیس سے رابطہ کیا اور اس علاقے میں جلوس نکالنے کیلئے سیکیورٹی مانگی۔

مکار پورہ تھانے کے انسپکٹر رشمین سولنکی کا کہنا ہے کہ میں نے ان سے ہر طرح کی مدد کا وعدہ کیا ہے۔