لاہور: برطانوی ہائی کمشنر کرسچن ٹرنر کی لاہور میں چیئرمین پی ٹی آئی عمران خان سے ملاقات ہوئی۔

زمان پارک میں کرسچن ٹرنر نے عمران خان سے ملاقات کی، اس دوران چیئرمین پاکستان کرکٹ بورڈ (پی سی بی) رمیز راجہ اور فواد چوہدری بھی موجود تھے۔

برطانوی ہائی کمشنر نے سابق وزیراعظم کی عیادت کی اور نیک تمناؤں کا اظہار کیا جب کہ کرسچن ٹرنر نے عمران خان پر کیے گئے قاتلانہ حملے کی شدید الفاظ میں مذمت کی۔

ملاقات میں کرسچن ٹرنر نے عمران خان کو انگلینڈ کرکٹ ٹیم کے دورہ پاکستان کی تفصیلات سے آگاہ کیا اور چیئرمین پی سی بی نے بھی قذافی اسٹیڈیم لاہور کی لیز کے حوالے سے بریفنگ دی۔

اس کے علاوہ برطانوی ہائی کمشنر سے ملاقات کے دوران سابق وزیراعظم نے انگلش کرکٹ ٹیم کے دورے کے لئے پنجاب حکومت کو بہترین سکیورٹی فراہم کرنے کی ہدایت کی۔