پاکپتن میں ایس پی چوک کے قریب مخالفین کی فائرنگ سے 3 سگے بھائی جاں بحق ہوگئے جبکہ ملزمان فرار ہوگئے۔
پولیس کے مطابق مقتولین اور ملزمان میں قتل کی رنجش پر دیرینہ تنازع چل رہا تھا، جس کی پیشی پر مقتولین عدالت آرہے تھے کہ ملزمان نے تعاقب کرکے فائرنگ کردی۔
فائرنگ کے واقعے میں 3 سگے بھائی جان کی بازی ہار گئے ، جن کی شناخت ارشاد، تنویر اور ممتاز کے نام سے ہوئی ہے۔
پولیس کے مطابق تینوں بھائیوں کی لاشیں پوسٹ مارٹم کے لئے اسپتال منتقل کردی گئیں۔
پولیس کا کہنا ہے کہ واقعے کے بعد ملزمان موقع سے فرار ہوگئے، جن کی گرفتاری کے لئے چھاپے مارے جارہے ہیں۔
وزیراعلیٰ پنجاب چوہدری پرویز الہٰی نے پاکپتن میں 3 بھائیوں کے قتل کے واقعے کا نوٹس لیتے ہوئے انسپکٹر جنرل (آئی جی) پولیس سے رپورٹ طلب کر لی۔
چوہدری پرویز الہٰی نے ہدایت کی کہ واقعے میں ملوث ملزمان کی جلد گرفتاری یقینی بنائی جائے، ملزمان کو قانون کی گرفت میں لا کر مزید کارروائی کی جائے۔
وزیراعلیٰ پنجاب نے ہدایت کی کہ مقتولین کے لواحقین کو انصاف کی فراہمی یقینی بنائی جائے۔
