اسلام آباد میں حقیقی آزادی جلسے اور دھرنے کے لیے تحریک انصاف نے ضلعی انتظامیہ کو خط لکھ دیا۔

پی ٹی آئی نے ضلعی انتظامیہ کو ایک بار پھر احتجاج اور دھرنے کی اجازت کی درخواست دے دی اورضلعی انتظامیہ کے تحفظات پر اپنا موقف تحریر کردیا۔

خط کا جواب صدر تحریک انصاف اسلام آباد علی نواز اعوان کی جانب سے دیا گیا، جس میں کہا گیا ہے کہ انتظامیہ کو مطلوب معلومات مہیا کی جا چکی ہیں، جلسہ کی فوری اجازت دی جائے۔

انہوں نے کہا کہ انتظامیہ کی جانب سے تاخیر توہینِ عدالت کے زُمرے میں آئے گی۔ پی ٹی آئی نے 4 نومبر کو جی 9 اور ایچ 9 کے درمیان جلسہ اور دھرنا کرنے کی درخواست دے رکھی ہے۔

علی نواز اعوان کا کہنا ہے کہ انتظامیہ کو پرامن جلسہ کی یقین دہانی کرائی ہے، پی ٹی آئی کی پہلی درخواست کے بعد جمعہ کو ضلعی انتظامیہ نے تحفظات کے ساتھ واپس کی تھی۔