عمران خان نے توشہ خانہ ریفرنس میں نااہلی کا فیصلہ چلینج کردیا۔

اسلام آباد ہائیکورٹ میں عمران خان کی جانب سے بیرسٹر علی ظفر نے دائر درخواست میں استدعا کی کہ الیکشن کمیشن کا فیصلہ کالعدم قراردیا جائے۔

اسلام آباد ہائیکورٹ رجسٹرار آفس نے درخواست پر اعتراض عائد کر دیا، اور کہا کہ عمران خان نے بائیومیٹرک تصدیق نہیں کرائی، نااہلی فیصلے کی مصدقہ نقل درخواست کے ساتھ منسلک نہیں۔

جس کے بعد عمران خان کی آج ہی سماعت کرنے کی درخواست مسترد کرتے ہوئے پیر کیلئے مقرر کردیا۔

اس سے قبل، الیکشن کمیشن نے توشہ خانہ ریفرنس میں چیئرمین پاکستان تحریک انصاف عمران خان کو پانچ برس تک سرکاری عہدے کے لیے نااہل قرار دے دیا۔

عمران خان کی نااہلی کا فیصلہ چیف الیکشن کمشنرسکندرسلطان راجا کی سربراہی میں5رکنی کمیشن نے فیصلہ سنایا جس نے عمران خان کو کرپٹ پریکٹسز یعنی بدعنوانی کا مرتکب قرار دیا۔

الیکشن کمیشن نے19ستمبرکو فیصلہ محفوظ کیا تھا۔ فیصلہ سنانے کیلئے جمعہ کو سابق وزیراعظم عمران خان سمیت دیگر فریقین کو طلبی کے نوٹسز جاری کیے گئے تھے۔

الیکشن کمیشن نے اپنے فیصلے میں قراردیا کہ عمران خان نےجھوٹابیان حلفی جمع کرایا۔ وہ غلط گوشوارے جمع کروا کے بدعنوانی کے مرتکب ہوئے۔