فلم دی لیجنڈ آف مولاجٹ کو دنیا بھر میں ریلیز کردیا گیا ہے جو پاکستان سمیت دنیا بھر میں زبردست پذیرائی حاصل کررہی ہے۔

ایسے میں پاکستان فلم ڈائریکٹر وجاہت رؤف نے دعویٰ کیا ہے کہ 70 فیصد سینما گھروں میں فلم “ دی لیجنڈ آف مولا جٹ“ دکھائی ہی نہیں جا رہی۔

انسٹاگرام پر اپنی ایک پوسٹ میں وجاہت رؤف نے اس بات پر حیرت کا اظہار کیا ہے کہ 70 فیصد سینما گھروں میں لیجنڈ آف مولا جٹ نہیں دکھائی جا رہی، یہ انتہائی حیران کن، افسوسناک اور ظالمانہ ہے۔

انہوں نے سیاستدانوں کو تنقید کا نشانہ بناتے ہوئے کہا کہ حکومت اور اپوزیشن ایک دوسرے پر کیچڑ اچھال رہی ہیں اور انہیں آرٹس میں کوئی دلچسپی نہیں ہے، اگر باضابطہ طور پر ریگولیٹ نہ کیا گیا تو ہمارا سینما دوسری بار مر جائے گا۔

انہوں نے طنزیہ انداز میں مزید کہا کہ پھر کہتے ہیں سافٹ امیج پرموٹ کرو۔

دوسری جانب فلم کی پروڈیوسر عمارہ حکمت نے اپنی ایک ٹوئٹ میں سینما گھر جانے والوں سے درخواست کی ہے کہ وہ مولا جٹ کے ویڈیو کلپس سوشل میڈیا پر پوسٹ نہ کریں۔

عمارہ حکمت نے ٹوئٹ میں لکھا کہ سوشل میڈیا پر فلم کے کلپس شیئر کرنے والے ان افراد کا مزہ خراب کردیں گے جو فلم دیکھنے جانے کا ارادہ رکھتے ہیں۔