وزیرخارجہ بلاول بھٹو زرداری جرمنی کے پہلے دورے پر برلن پہنچے اور ایک انٹرویو میں کہا کہ امریکی حکام سے ملاقات میں سیلاب کے علاوہ سائفر یا مبینہ دھمکی پر بات نہیں ہوئی۔

جرمن دفتر خارجہ کے نمائندے ڈاکٹر محمد فیصل اور ان کی ٹیم نے ائیرپورٹ پر بلاول بھٹو کا استقبال کیا۔ وزیرخارجہ بلاول بھٹو اپنے دورے کے دوران اپنی ہم منصب اینالینا بیرباک اور بنڈس پریذیڈنٹ سے ملاقات کریں گے۔

دوسری جانب وزیر خارجہ بلاول بھٹو کا کہنا ہے کہ ڈونلڈ لو سے ملاقات میں سائفر یا مبینہ دھمکی پر بات نہیں ہوئی، بات چیت کا محور سیلاب سے تباہی تھا۔

نجی ٹی وی کو خصوصی انٹرویو دیتے ہوئے وزیر خارجہ بلاول بھٹو نے بتایا کہ میری امریکی وزیر خارجہ بلنکن سے ملاقات کے موقع پر اسسٹنٹ سیکرٹری ڈونلڈ لو بھی موجود تھے۔

بلاول کا کہنا تھا کہ بلنکن سے بات چیت کا محور سیلاب سے تباہی تھا، انہوں نے کہا کہ غیر ملکی سازش کی بات کرنے والے امریکیوں سے الیکشن کی بات کریں تو افسوسناک ہے۔

ان کا کہنا تھا کہ خان صاحب کی کوشش ہے زبردستی کسی امپائر کی انگلی اٹھ جائے، امپائر کی انگلی اٹھنے سے متعلق عمران کی کوشش ناکام رہے گی۔

انہوں نے کہا کہ عدالت کو فیصلہ کرنا ہوگا کہ کب تک عمران کو لاڈلے کی طرح چلائیں گے۔