لاہور:چیف سیکرٹری پنجاب کامران علی افضل 2 ہفتے کی رخصت پر چلے گئے، جس کا نوٹیفکیشن جاری کردیا گیا۔

چیف سیکرٹری پنجاب کامران علی افضل نے اپنےعہدے پر کام کرنے سے معذرت کرتے ہوئے بطور چیف سیکرٹری 14روز کی چھٹی لے لی ہے۔

کامران علی افضل 17 ستمبر سے 30 ستمبر تک رخصت پر چلے گئے ہیں، ان کی عدم موجودگی میں چیئرمین پی اینڈ ڈی عبداللہ خان سنبل بطور چیف سیکرٹری خدمات سرانجام دیں گے۔

یاد رہے کہ چیف سیکرٹری کامران علی افضل اور پنجاب حکومت کے درمیان سرد جنگ چل رہی تھی۔

چیف سیکرٹری پنجاب کامران علی افضل نے 6 اگست کو وفاقی حکومت کو ایک خط کے ذریعے اپنی خدمات پنجاب سے واپس وفاق میں لینے کی درخواست کی تھی مگر وفاقی حکومت نے ضمنی انتخابات کے شیڈول کے اعلان کی وجہ سے تبادلہ نہیں کیا۔

حکومت پنجاب کی طرف سے ایک خط میں نئے چیف سیکرٹری کی تعیناتی کے لیےعبداللہ خان سنبل، بابر حیات تارڑ اور احمد نواز سکھیرا کے ناموں کا پینل بھیجا گیا مگر وفاقی حکومت نے کسی کو بھی چیف سیکرٹری تعینات نہیں کیا۔