وفاقی وزیر خزانہ مفتاح اسماعیل نے اعتراف کرتے ہوئے کہا کہ ہاں ملک میں مہنگائی بہت زیادہ ہے، اسے دو ماہ میں کنٹرول میں لے آئیں گے۔

کراچی میں پریس کانفرنس کرتے ہوئے مفتاح اسماعیل نے کہا کہ جھوٹ بولا گیا کہ ہم نے خط بین الاقوامی مالیاتی فنڈ (آئی ایم ایف) کو نہیں بھیجا، کیا یہ کافی نہیں تھا آپ نے ملک کو دیوالیہ کردیا، آڈیو لیک میں شوکت ترین کی ہی آواز تھی۔

انہوں نے کہا کہ آپ لوگ جھوٹ کا چورن بیچ رہے ہیں، جھوٹ پر جھوٹ بولنا چھوڑ دیں اور اس ملک کو معاف کردیں۔ شوکت ترین نے آئی ایم ایف سے کہا تھا کہ عدم اعتماد ناکام ہونے کے بعد پیٹرول مہنگا کردیں گے۔

وزیر خزانہ نے سیلاب کی تباہ کاریوں پر گفتگو کرتے ہوئے کہا کہ سندھ میں کپاس کی 14 لاکھ ایکڑ اور گنے کی 20 فیصد فصل تباہ ہوگئی جب کہ آدھے سے زیادہ پیاز کی فصل بھی خراب ہوچکی ہے۔

مفتاح اسماعیل نے کہا کہ اللہ کی مہربانی سےملکی معیشت بچ گئی ہے مگر ہاں مہنگائی بہت زیادہ ہے جسے ہم دو ماہ میں قابو کرلیں گے۔