بھارتی دارالحکومت دہلی کی پولیس نے امیروں کو لوٹ کرغریبوں کی مدد کرنے والے ‘رابن ہُڈ’ وسیم اکرم کو گرفتارکرلیا۔

دہلی کا ‘رابن ہُڈ’ کہلائے جانے والے وسیم اکرم عرف لمبو پرالزام ہے کہ وہ بطورسرغنہ اپنے 25 رکنی گروہ کے ساتھ مل کرمتمول طبقے کے افراد کے زیورات اور رقم چراتا اورکچھ حصہ غریبوں میں تقسیم کردیتا تھا۔

پولیس کے مطابق 27 سالہ وسیم اکرم اورکارندوں نے دہلی کے پوش علاقوں میں بڑے گھروں کو لوٹا۔

رابن ہُڈ پر اقدامِ قتل اور ریپ سمیت جرائم کی 160 وارداتوں میں ملوث ہونے کا الزام ہے، پولیس کی خصوصی ٹیم 4 ماہ کی مسلسل کوششوں کےبعد ملزم تک پہنچنے میں کامیاب ہوئی۔

دہلی پولیس کی جانب سے جاری کیے جانے والے بیان کے مطابق وسیم اکرم کے بیت سے چیلے اس کے علاقے میں ہمہ وقت موجود رہ کر اسے پولیس کی نقل وحرکت سے متعلق فوری معلومات فراہم کرتے تھے تا کہ وہ پکڑا نہ جاسکے۔

بیان میں وسیم اکرم عرف لمبو کو ’عادی مجرم ’ قراردیتے ہوئے کہا گیا ہے کہ ہر وقت اپنے ٹھکانے بدلتا رہتا تھا اور اس کے یہ ٹھکانے کئی ریاستوں میں تھے۔ اس باراسے انسپکٹر شیو کمار کی قیادت میں ٹیم نے آنند وہار ریلوے اسٹیشن کے قریب سے پکڑا۔ ملزم کے قبضے سے پستول برآمد ہوا جس میں 3 گولیاں تھیں۔

پولیس نے یہ بھی بتایا کہ دہلی کے اس مقامی ‘رابن ہُڈ’ کو آس پاس کی بستیوں میں انتہائی مقبولیت حاصل تھی کیونکہ وہ اپنی وارداتوں سے حاصل ہونے والے مال کا کچھ حصہ سب سے پہلے غرباء میں تقسیم کردیتا تھا اور یہی وجہ تھی کہ انہی افراد کی مخبریوں کے باعث وہ ایک لمبے عرصے تک پولیس کے ہاتھ نہ آیا۔