پاکستان نے چودہ اگست کی تاریخی حیثیت متنازع کرنے پر بھارت سے اظہارِ مذمت کیا ہے۔
ترجمان دفترخارجہ کا کہنا ہے کہ چودہ اگست کوتقسیمِ ہندوستان کی ہولناکیوں کی یاد بنانا قابل مذمت ہے، بھارتی حکومت آزادی سے متعلقہ تاریخی حقائق پرسیاست نہ کرے۔
دفتر خارجہ کی جانب سے جاری بیان میں کہا گیا ہے کہ افسوسناک ہے بی جے پی حکومت اپنے منقسم سیاسی ایجنڈے کے حصہ کے طور پر تاریخ کی مسخ شدہ تشریح کے ذریعے عوام کے جذبات سے کھیلنے کی کوشش کر رہی ہے۔
دفتر خارجہ نے کہا کہ اگر ہندوستانی لیڈروں کو حقیقی طور پر اذیت، تکلیف اور درد کی پرواہ ہے تو انہیں ہندوستان میں مسلمانوں اور دیگر اقلیتوں کے حالات کو بہتر بنانے کے لیے کام کرنا چاہیے۔
“پچھلی سات دہائیاں اس بات کے ناقابل تردید ثبوتوں سے بھری ہوئی ہیں کہ ہندوستان کی سیکولرازم کی حمایت ایک دھوکہ تھی۔ حقیقت یہ ہے کہ آج کا ہندوستان ایک غیر اعلانیہ ‘ہندو راشٹرا’ ہے، جس میں دیگر مذہبی اقلیتوں کے لیے کوئی جگہ یا رواداری نہیں ہے، خاص طور پر مسلمانوں کے لیے جنہیں امتیازی سلوک، ظلم و ستم اور سیاسی و سماجی طور پر اقتصادی اخراج کا سامنا ہے۔”
دفتر خارجہ نے حکومتِ ہند کو مشورہ دیا کہ وہ آزادی سے متعلق واقعات پر سیاست کرنے سے باز آئے اور اس کے بجائے ان تمام لوگوں کی یادوں کا مخلصانہ احترام کرے جنہوں نے سب کے بہتر مستقبل کے لیے قربانیاں دیں۔
