اسلام آباد: وفاقی حکومت نے قانون کے مطابق الیکشن کمیشن کے ممنوعہ فنڈنگ کیس کے فیصلے پر عمل درآمد کرنے کا اعلان کردیا۔

وزیر اطلاعات مریم اورنگزیب نے ممنوعہ فنڈنگ کیس کے فیصلے کو عمران خان کے خلاف جرائم کی تصدیق قرار دیتے ہوئے کہا کہ چور، جھوٹا اور منی لانڈرر آخر 8 سال بعد پکڑا گیا، عمران خان عالمی منی لانڈرر ثابت ہو چکا ہے۔

مریم اورنگزیب کا کہنا تھا کہ الیکشن کمیشن فیصلے کے بعد عمران خان صادق اور امین نہیں، پارٹی چیئرمین کے عہدے سے فوری استعفیٰ دیں، عمران خان پاکستان کے خلاف غیر ملکی سازشی منصوبہ تھا اور ہے، عمران خان جھوٹا اور جعلساز ہے، الیکشن کمیشن نے مہر لگا دی ہے۔

وفاقی وزیر اطلاعات نے مزید کہا کہ اسرائیل، بھارت، امریکا اور کینیڈا سمیت دیگر ملکوں سے فارن فنڈنگ لی، عمران خان نے غیرقانونی فنڈنگ سے پاکستان میں فتنہ برپا کیا، عمران خان نے جعلی اور جھوٹے بیان حلفی جمع کرائے۔

مزید پڑھیں: الیکشن کمیشن نے ممنوعہ فنڈنگ کیس کا فیصلہ سنا دیا

منگل کے روز الیکشن کمیشن نے پی ٹی آئی فارن فنڈنگ کیس میں عمران خان کے بیان حلفی کو غلط قرار دیتے ہوئے شوکاز نوٹس جاری کردیا۔

چیف الیکشن کمشنر سکندر سلطان راجہ کی سربراہی میں پی ٹی آئی ممنوعہ فنڈنگ کیس کا فیصلہ سناتے ہوئے 3 رکنی بینچ نے ‘متفقہ’ فیصلے میں کہا کہ پاکستان تحریک انصاف پر ممنوعہ فنڈز لینا ثابت ہوگیا ہے۔