اسلام آباد:وزیراعظم شہبازشریف نے اسلام آباد میں گرین لائن اور بلیولائن بس سروس ایک ماہ تک فری چلانے کا اعلان کردیا اور کہا کہ تیل اور گیس قیمتوں نے پوری دنیا کو پریشان کر رکھا ہے، اللہ کا شکر ہے تیل کی قیمتوں میں کچھ کمی ہوئی ہے، جلد مہنگائی میں بھی کمی آئے گی۔
وزیراعظم شہبازشریف نے آج بروز جمعرات 7 جولائی کو اسلام آباد میں گرین لائن اور بلیو لائن بس سروس منصوبے کا افتتاح کیا۔
منصوبےکی افتتاحی تقریب سے خطاب کرتےہوئے کہا کہ آج میرے لئے خوشی کا موقع ہے، عوام سفری سہولت سے فیض یاب ہوں گے، پوری دنیا میں تیل اور گیس کی قیمتیں آسمان سے باتیں کررہی ہیں، بڑھتی قیمتوں نے لوگوں کو پریشان کررکھا ہے، اللہ کا شکر ہے کہ اب تیل اورگیس کی قیمتوں میں کچھ کمی ہوئی ہے۔
Inauguration of Green & Blue Lines of Metro Bus Service is great news for citizens of Islamabad & surrounding areas. It’s part of our efforts to provide efficient & comfortable public transport system. It will address problems of traffic load, fuel cost & environmental hazards. pic.twitter.com/brkyL2Vmfj
— Shehbaz Sharif (@CMShehbaz) July 7, 2022
وزیراعظم نے کہا کہ اس منصوبےمیں تاخیربرداشت نہیں کی جائے گی، گرین اور بلیو لائن اسلام آباد اور راولپنڈی کے عوام کی بہت بڑی خدمت ہے، ایک ماہ کیلئے گرین اور بلیو لائن سروس مفت فراہم کی جائے گی۔
شہباز شریف کا کہنا تھا کہ منصوبوں کی تکمیل کرنے والوں کا مشکور ہوں، عوامی مشکلات کو دیکھتے ہوئے بس سروس کا افتتاح کا آغاز کیا جارہا ہے، ہم دعا گو ہیں کہ تیل کی قیمتیں جلدکم ہوں، مہنگائی کا سلسلہ پچھلے 4 سال سے جاری ہے، 4 سال کی تاخیر کا قوم جواب مانگتی ہے۔
وزیراعظم شہبازشریف کا مزید کہنا تھا کہ 20 ارب ڈالر سالانہ تیل اور گیس پاکستان میں امپورٹ کی جاتی ہے، بجلی بہت مہنگی بن رہی ہے، کل رات تیل کی قیمت 100 ڈالر سے کم ہوئی ہے، جتنی جلد تیل کی قیمت کم ہوگی اسی طریقے سے بجلی اور گیس سستی بنے گی۔
شہبازشریف نے کہا کہ ہم آج ایک جامع منصوبہ بنا رہے ہیں، سستی شمسی توانائی منصوبوں کا جال بچھانا چاہتے ہیں، آج کی میٹنگ میں شمسی توانائی کے حوالے سے فیصلے کریں گے،شمسی توانائی سےعوام کومہنگی بجلی سےجان چھوٹ جائےگی۔
وزیراعظم شہباز شریف نے مزید فلاحی منصوبے لانے کا بھی اعلان کیا ہے۔
اسلام آباد پولیس کی تنخواہیں پنجاب پولیس کے برابرکردی: رانا ثناء اللہ
اس موقع پر وزیرداخلہ رانا ثناء اللہ نے کہا کہ عام آدمی کیلئے سفری سہولت فراہم کی جارہی ہے، عام شہری بس سروس سے فائدہ اٹھاسکیں گے، عام آدمی کی زندگی میں بہتری لانا وزیراعظم کی ترجیح رہا ہے، اسلام آباد پولیس کی تنخواہیں پنجاب پولیس کے برابر کردی گئی ہیں۔
وزیرداخلہ نے کہا کہ ایک ماہ بعداسلام آباد پولیس کیلئے اسپتال کا سنگ بنیاد رکھیں گے، عام آدمی پیٹرول کی قیمت بڑھنے سے متاثر ہے، مہنگائی کے دور میں بس سروس عام آدمی کیلئےنعمت سے کم نہیں، ماضی کے حکمران گھر سے دفتر آتے جاتے پریس کانفرنس کرتے تھے۔
