لندن: باکسر عامر خان اور ان کی اہلیہ سے ڈکیتی کے الزام میں تین افراد کو گرفتار کر لیا گیا ہے۔

سابق عالمی چیمپئن باکسر نے ٹوئٹر پر شیئر کیا کہ دو لڑکوں نے لیٹن کے ہائی روڈ پر گن پوائنٹ پر ان کی 72 ہزار پاؤنڈ مالیت کی گھڑی چھین لی۔

اس حوالے سے میٹروپولیٹن پولیس نے کہا ہے کہ ڈکیتی کی تحقیقات کرنے والے افسران نے تین گرفتاریاں کیں ہیں، جبکہ تینوں افراد کی عمر 20 سال سے 25 سال تک بتائی جا رہی ہے۔

پولیس نے مزید کہا کہ “واقعے کے دوران کسی کو چوٹ نہیں آئی اور نہ ہی کوئی گولی چلائی گئی۔”

دوسری جانب کاؤنٹی ٹائمز نے رپورٹ کیا کہ گرفتار ہونے والوں میں احمد بانا، نورالامین، اور ڈینٹ کیمبل شامل ہیں جن کو مجسٹریٹس کی عدالت میں پیش کیا جائے گا۔